同屋企人傾開, 早十年八年成日都返鄉下過新年, 放煙花燒炮仗, 近年大家都好耐無返鄉下, 每次都係爸媽返去多, 於是就計劃帶晒所有小朋友陪爸媽返鄉下探親, 兼返去玩兩日嘞~!
十幾人一齊出動, 好熱鬧!
老家在東莞既塘廈, 係深圳有旅游巴可以去到. 只要係羅湖口岸過關, 出左羅湖商業城, 係右手邊就會見到個巴士站架嘞.
今日咁啱大陸都係三日長假期, 所以路面比較多車, 一共要1小時15分鐘先到, 平時少車的話, 45-60分鐘左右就可以返到塘廈.
今次我哋入住新都會怡景酒店, 鐘意佢有基本設施得黎, 附近有食肆商場, 對面就係蓮湖新村, 行5分鐘左右就有24小時營業既麥當勞, 而且咁啱巴士就係以佢為塘廈總站, 所以非常方便.
酒店唔算新, 起碼都有十年以上既歷史, 但都尚算保養得唔錯.
旅游巴總站係正門口.
酒店房唔算大, 但四四正正, 乾淨無煙味無怪味, 住得放心. 房內有WIFI, 有兩枝水送, 小心睇清楚唔好飲錯要收錢果兩枝, 每枝要RMB30架!
Check in完就即刻係酒店入面既酒樓食中午飯, 四個字, 非常難食! 好多點心都無做, 炸野好油, 炒粉麵又細碟, 又落漏order... 埋單唔平, RMB500以上, 十三個人之中得四個老人家話飽..
有幾唔飽? 我地九個後生出去食麥當勞, 叫既嘢其實好似正餐咁叫.
兩個雞盒, 兩杯雪榚, 仲有一個包餐無影到. 個雞盒好食~ 好而且香港無得食, 有機會要試下~!
食飽仲有波送, 一路玩一路行返酒店.
返到酒店就即刻換衫去游水嘞~!!
個泳池叫芭堤雅酒店
環境都唔錯
阿仔好開心!
笑唔停~
游完水就去咗探親,仲係人哋屋企食埋飯。不過天氣太熱, 又係室外空地開飯,我真係熱到無乜胃口食,所以夜晚返酒店都要開杯麵食。
我都算有先見之明,買個唔辣嘅杯麵,諗住阿仔都可以食兩啖。失策嘅係,我應該買兩個,因為阿仔都好肚餓...
不過實在好攰,食完就攤咗係床瞓著咗。
第二朝實在好肚餓, 一早就醒咗, 等等等, 終於等到去食自助早餐嘞!
款式都算唔少, 即煮蛋好好食, 所以蛋檔好好生意,要預時間等佢整。
早餐後又係去玩嘅時候, 今日係端午節,更加要游龍舟水啦! 呢兩日天氣都好好,適合游水, 正~
玩完就差唔多要check out嘞, 約咗親友去酒店附近嘅美食街食午飯。其實唔遠,不過唔太識行,又熱, 慘在的士難搵, 所以最後搭白牌車。
食完就走, 返去酒店對面就係車站嘞。輕鬆開心嘅兩日旅程完滿結束!
沒有留言:
張貼留言